Sceideal D

Vótaí a Leithroinnt

1.   Sealbhóidh gach Ballstát dá dtagraítear in airteagal 5 (a):

(a) 150 bunvóta;

(b) An líon vótaí a leithroinnfear air i leith Scaireanna Caipitil Dhíor-Ranníoctha a bheidh suibscríofa aige, mar atá leagtha amach san iarscríbhinn a ghabhann leis an sceideal seo;

(c) Vóta amháin in aghaidh gach 37,832 Aonad Cuntais de Chaipiteal Ráthaíochta a sholáthróidh sé;

(d) Aon vótaí a leithroinnfear air de réir mhír 3 den sceideal seo.

2.   Sealbhóidh gach Ballstát dá dtagraítear in airteagal 5 (b):

(a) 150 bunvóta;

(b) Líon vótaí i leith Scaireanna Caipitil Dhíor-Ranníoctha a shuibscríobh sé, a bheidh le cinneadh ag an gComhairle Rialaithe le Tromlach Cáilithe ar bhonn atá ar comhréir leis an leithroinnt ar na vótaí dá bhforáiltear san iarscríbhinn a ghabhann leis an sceideal seo;

(c) Vóta amháin in aghaidh gach 37,832 Aonad Cuntais de Chaipiteal Ráthaíochta a sholáthróidh sé;

(d) Aon vótaí a leithroinnfear air de réir mhír 3 den sceideal seo.

3.   I gcás ina gcuirfear Scaireanna Caipitil Dhíor-Ranníoctha neamhshuibscríofa nó breise ar fáil lena suibscríobh de réir airteagal 9, mír 4 (b) agus (c), agus airteagal 12, mír 3, déanfar dhá vóta breise a leithroinnt ar gach Ballstát in aghaidh gach Scair Chaipitil Dhíor-Ranníoctha bhreise a shuibscríobhfaidh sé.

4.   Coimeádfaidh an Chomhairle Rialaithe leagan amach na vótála faoi athbhreithniú i gcónaí agus má bhíonn éagsúlacht shuntasach idir leagan amach na vótála iarbhír agus an leagan amach dá bhforáiltear san iarscríbhinn a ghabhann leis an sceideal seo, déanfaidh an Chomhairle aon choigeartuithe is gá de réir na bprionsabal bunúsach a rialaíonn dáileadh vótaí atá léirithe sa sceideal seo. Nuair a bheidh an Chomhairle Rialaithe ag déanamh na gcoigeartuithe sin cuirfidh sí an méid seo a leanas san áireamh:

(a) An comhaltas;

(b) An líon Scaireanna Caipitil Dhíor-Ranníoctha;

(c) An méid Caipitil Ráthaíochta.

5.   Déanfar coigeartuithe i ndáileadh vótaí de bhun mhír 4 den sceideal seo de réir rialacha agus rialachán a bheidh le glacadh chuici ag an gComhairle Rialaithe chun na críche sin le Tromlach Ardcháilithe ag a céadchruinniú bliantúil.