CUID III.

Luacháil a Laghdú go Sealadach (Bun Crannaighe).

6. —Sa Chuid seo den Acht seo—

ciallaíonn “an contae” contae Dhún na nGall;

ciallaíonn “an ceantar uirbeach” ceantar uirbeach Bhun Crannaighe;

ciallaíonn “bliain airgeadais áitiúil iomchuí” bliain airgeadais áitiúil a sonraítear sa Sceideal a ghabhas leis an Acht seo;

ciallaíonn “an tsuim iomchuí” maidir le bliain airgeadais áitiúil iomchuí, an tsuim a sonraítear sa Sceideal a ghabhas leis an Acht seo i leith na bliana sin.

7. —Nuair a beifear ag cur fo-ailt (6) d'alt 10 den Acht Rialtais Áitiúil, 1946 ( Uimh. 24 de 1946 ), i bhfeidhm maidir leis na caiteachais de chuid comhairle na contae a muirearaítear i mbliain airgeadais áitiúil iomchuí agus is muirir ar an gcontae go hiomlán, beidh éifeacht ag na forála seo a leanas d'ainneoin fo-ailt (7) den alt sin:

(a) measfar gurb ionann luacháil na contae agus an tsuim iomchuí móide iomlán na luachál, do réir na liostaí luachála a bheas i bhfeidhm de thuras na huaire faoi na hAchta Luachála, ar na hoidhreachtáin agus na tionóntáin go léir atá sa chuid den chontae nach bhfuil sa cheantar uirbeach,

(b) measfar gurb ionann luacháil an cheantair uirbigh agus an tsuim iomchuí.