Uimhir 19 de 1982

AN tACHT DÉANTÓIREACHTA SIÚCRA (LEASÚ), 1982

[An tiontú oifigiúil]

ACHT DO LEASÚ AGUS DO LEATHNÚ NA nACHTANNA DÉANTÓIREACHTA SIÚCRA, 1933 GO 1973. [21 Iúil, 1982]

ACHTAÍTEAR AG AN OIREACHTAS MAR A LEANAS:

Mínithe.

1. —San Acht seo—

ciallaíonn “Acht 1962” an tAcht Déantóireachta Siúcra (Leasú), 1962 ;

ciallaíonn “Acht 1973” an tAcht Déantóireachta Siúcra (Leasú), 1973 .

Leasú ar alt 2 d'Acht 1962.

2. —Leasaítear leis seo alt 2 d'Acht 1962 trí “go dtí seachtó is cúig mhilliún punt san iomlán arna roinnt ina sheachtó is cúig mhilliún scair” a chur in ionad “go dtí deich milliún punt san iomlán arna roinnt ina dheich milliún scair” (a cuireadh isteach le hAcht 1973), agus tá an t-alt sin, arna leasú amhlaidh, leagtha amach sa Tábla a ghabhann leis an alt seo.

AN TÁBLA

2.—D'ainneoin aon ní contrártha dó atá sa Phríomh-Acht, nó i Meabhrán Comhlachais nó in Airteagail Chomhlachais na Cuideachta, is dleathach don Chuideachta a scair-chaipiteal a mhéadú go dtí seachtó is cúig mhilliún punt san iomlán arna roinnt ina sheachtó is cúig mhilliún scair de phunt an ceann agus chuige sin cibé athruithe is gá a dhéanamh ar Mheabhrán Comhlachais agus Airteagail Chomhlachais na Cuideachta.

Leasú ar alt 3 d'Acht 1962.

3. —Leasaítear leis seo alt 3 d'Acht 1962 trí “sheachtó is cúig mhilliún punt” a chur in ionad “ocht milliún cúig chéad míle punt” (a cuireadh isteach le hAcht 1973), agus tá an t-alt sin, arna leasú amhlaidh, leagtha amach sa Tábla a ghabhann leis an alt seo.

AN TÁBLA

3.—Féadfaidh an tAire ó am go ham aon aicme nó aicmí scaireanna leis an gCuideachta nó le fo-chuideachta cheadaithe a fháil ó am go ham trí shuibscríobhadh nó ceannach, ach ní rachaidh méid iomlán na scaireanna a bheidh arna bhfáil amhlaidh aon tráth áirithe thar sheachtó is cúig mhilliún punt (luach ainmniúil).

Leasú ar alt 7 d'Acht 1962.

4. —Leasaítear leis seo alt 7 d'Acht 1962 trí “sheachtó is cúig mhilliún punt” a chur in ionad “dheich milliún punt” (a cuireadh isteach le hAcht 1973), agus tá an t-alt sin, arna leasú amhlaidh, leagtha amach sa Tábla a ghabhann leis an alt seo.

AN TÁBLA

7.—Ní rachaidh a gcomhshuim seo a leanas, is é sin—

(a) airleacain faoi alt 4 den Acht seo nach mbeidh aisíoctha,

(b) príomhshuim a mbeidh an tAire faoi dhliteanas í a aisíoc ar scór aon ráthaíochta nó ráthaíochtaí faoi alt 5 den Acht seo, agus

(c) príomhshuim a bheidh an tAire tar éis a íoc roimhe sin ar aon ráthaíocht nó ráthaíochtaí den sórt sin agus nach mbeidh aisíoctha ag an gCuideachta nó ag an bhfo-chuideachta cheadaithe (de réir mar a bheidh),

thar sheachtó is cúig mhilliún punt aon tráth áirithe.

Gearrtheideal, comhlua agus forléiriú.

5. —(1) Féadfar an tAcht Déantóireachta Siúcra (Leasú), 1982 , a ghairm den Acht seo.

(2) Féadfar na hAchtanna Déantóireachta Siúcra, 1933 go 1982, a ghairm de na hAchtanna Déantóireachta Siúcra, 1933 go 1973, agus den Acht seo le chéile, agus forléireofar le chéile iad mar aon Acht amháin.