CUID 5

Dliteanas Coiriúil

Cionta áirithe faoin dlí coiteann a chealú.

35 .— Cealaítear na cionta faoin dlí coiteann ar leabhal clúmhillteach, leabhal ceannairceach agus leabhal graosta iad.

Ní diamhaslach a fhoilsiú nó a chur i gcaint.

36 .— (1) Aon duine a dhéanfaidh ní diamhaslach a fhoilsiú nó a chur i gcaint, beidh sé nó sí ciontach i gcion agus dlífear, ar é nó í a chiontú ar díotáil, fíneáil nach mó ná €25,000 a chur air nó uirthi.

(2) Chun críocha an ailt seo, déanann duine ní diamhaslach a fhoilsiú nó a chur i gcaint más rud é—

(a) go ndéanann sé nó sí ní a fhoilsiú nó a chur i gcaint atá rómhaslach nó rótharcaisneach i ndáil le nithe a maíonn aon chreideamh gur nithe beannaithe iad, agus, ar an tslí sin, uafás a spreagadh i measc lín shubstaintiúil de lucht leanúna an chreidimh sin, agus

(b) go mbeartaíonn sé nó sí, tríd an ní lena mbaineann a fhoilsiú nó a chur i gcaint, an t-uafás sin a spreagadh.

(3) Is cosaint é ar imeachtaí i leith ciona faoin alt seo don chosantóir a chruthú go gceapfadh duine réasúnach go bhfuil fiúntas dáiríre liteartha, ealaíonta, polaitiúil, eolaíochta nó acadúil sa ní lena mbaineann an cion.

(4) San alt seo, ní fholaíonn “creideamh” eagraíocht nó cultas—

(a) arb é a príomhchuspóir nó a phríomhchuspóir brabús a dhéanamh, nó

(b) a úsáideann ionramháil shíceolaíoch antrom—

(i) ar a leanúnaithe, nó

(ii) chun leanúnaithe nua a fháil.

Cóipeanna de ráitis dhiamhaslacha a urghabháil.

37 .— (1) I gcás ina gciontófar duine i gcion faoi alt 36, féadfaidh an chúirt barántas a eisiúint—

(a) á údarú d’aon chomhalta den Gharda Síochána dul isteach (trí fhorneart réasúnach a úsáid más gá) gach tráth réasúnach, in aon áitreabh (lena n-áirítear teaghais) ina bhfuil forais réasúnacha aige nó aici chun a chreidiúint go bhfuil cóipeanna den ráiteas lenar bhain an cion le fáil, agus an t-áitreabh sin a chuardach agus gach cóip den ráiteas a gheofar ann a urghabháil agus a thabhairt chun siúil.

(b) á ordú d’aon chomhalta den Gharda Síochána gach cóip den ráiteas lenar bhain an cion a bheidh i seilbh aon duine a urghabháil agus a thabhairt chun siúil,

(c) lena sonrófar an modh ina gcoinneoidh agus ina stórálfaidh an Garda Síochána cóipeanna arnan-urghabháil agus arna dtabhairt chun siúil amhlaidh.

(2) Féadfaidh comhalta den Gharda Síochána—

(a) dul isteach in aon áitreabh agus é a chuardach,

(b) aon chóip de ráiteas lena mbaineann cion faoi alt 36 a gheofar ann nó a gheofar i seilbh aon duine a urghabháil, a thabhairt chun siúil agus a choinneáil,

de réir barántais faoi fho-alt (1).

(3) Ar bhreithiúnas críochnaitheach a thabhairt in imeachtaí i leith ciona faoi alt 36, déanfar aon rud a urghabhfar agus a thabharfar chun siúil faoi fho-alt (2) a dhiúscairt de réir cibé ordachán a thabharfaidh an chúirt ar iarratas ó chomhalta den Gharda Síochána chuige sin.