Uimhir 25 de 1966.

AN tACHT UM CHISTÍ AGRÓIRÍ, 1966

[An tiontú oifigiúil.]

ACHT DO DHÉANAMH SOCRÚ CHUN CUID DE CHISTÍ AGRÓIRÍ ATÁ DÍLSITHE DO CHUNTASÓIR NA gCÚIRTEANNA BREITHIÚNAIS A DHIÚSCAIRT. [19 Iúil, 1966.]

ACHTAÍTEAR AG AN OIREACHTAS MAR LEANAS:—

1. —San Acht seo—

ciallaíonn “an cuntas” cuntas airgid ginearálta na gcistí agróirí atá i leabhair Bhanc na hÉireann in ainm Chuntasóir na gCúirteanna Breithiúnais;

ciallaíonn “na cistí agróirí” na cistí agróirí atá dílsithe do Chuntasóir na gCúirteanna Breithiúnais;

ciallaíonn “an tAire” an tAire Airgeadais.

2. —(1) Déanfaidh Banc na hÉireann, ar ordú ón bPríomh-Bhreitheamh, cibé suim nach mó ná £450,000, a theastóidh ón Aire, a íoc as an gcuntas leis an gCiste Caipitil.

(2) D'ainneoin aon ní i bhfo-alt (4) d'alt 4 den Acht Príomh-Chiste, 1956, féadfar an Ciste Caipitil, a mhéid gurb é na suimeanna é a íocfar leis de bhun an ailt seo, a chaitheamh chun Amharclann na Mainistreach (lena n-áirítear Amharclann na Péacóige), Baile Átha Cliath, agus an Opera House, Corcaigh, a atógáil.

(3) Ní chaithfear níos mó ná £415,000 faoin alt seo chun Amharclann na Mainistreach (lena n-áirítear Amharclann na Péacóige), Baile Átha Cliath, a atógáil, ná chun tairbhe don Státchiste le haon deontas nó deontais a tugadh cheana as an gcéanna chun na críche sin a aisíoc, agus ní chaithfear níos mó ná £35,000 faoin alt seo chun an Opera House, Corcaigh, a atógáil, ná chun tairbhe don Státchiste le haon deontas nó deontais a tugadh cheana as an gcéanna chun na críche sin a aisíoc.

(4) Aon suimeanna a íocfar leis an Státchiste (nach suimeanna a íocfar faoi fho-alt (3) den alt seo) i leith Amharclann na Péacóige a atógáil, is leis an gCiste Caipitil a íocfar iad.

(5) D'ainneoin aon ní i bhfo-alt (4) den alt sin 4, aisíocfaidh an tAire leis na cistí agróirí aon suimeanna a íocfar leis an gCiste Caipitil faoin alt seo agus nach mbeidh ag teastáil chun críocha fho-alt (2) nó (3) den alt seo.

3. —Má tharlaíonn aon tráth go mbeidh cistí agróirí laghdaithe go dtí suim nach leor chun freastal d'éilithe orthu, déanfaidh an tAire, chun lán-slánaíocht a sholáthar d'agróirí in aon chaillteanas a bhainfeadh dóibh mar gheall ar an Acht seo a rith, cibé suim, nach mó ná £450,000, is dóigh leis is gá a airleacan ar an bPríomh-Chiste nó a thoradh fáis.

4. —Féadfar an tAcht um Chistí Agróirí, 1966 , a ghairm den Acht seo.